近兩年江嘉敏頻頻大晒收花相，又騷多個名牌手袋，被傳撻着有米醫生，昨日她直認經常收花：「有男有女，生日收花好正常。（富貴醫生送？）唔係，之前有問係咪佢送，叫佢不如認咗佢，請我食飯好過啦！但佢話唔係佢。」問到有人送花，醫生會否呷醋？她笑問為何會呷醋：「唔好亂寫亂講，哈哈！係先好講，依家未係，交流吓先。」又表示不能夾硬來，一切隨緣，堅稱現時仍是單身。

另外，她透露近日積極收身、練歌及排舞，為即將公演的音樂劇《我們的青春日誌》作準備，將客串4場：「我完全一張白紙咁入去，要比其他人更努力。」她坦言有壓力，但導演叫她當參加舞會便可。